Therabody-ს ახალი ტექნოლოგია სიცხის მართვისთვის: როგორ ეხმარება CryoTherm Palm სპორტსმენებს შესრულების გაუმჯობესებაში

სიცხის მართვა სულ უფრო აქტუალური საკითხი ხდება პროფესიონალურ სპორტში, განსაკუთრებით ზაფხულის შეჯიბრებებისას. Therabody-მ, აღდგენის ტექნოლოგიებით ცნობილმა კომპანიამ, ახლახან წარმოადგინა CryoTherm Palm — პირველი მოწყობილობა, რომელიც სპეციალურად შეიქმნა საიმისოდ, რომ სპორტსმენებს მაღალი ინტენსივობის ვარჯიშებისა და შეჯიბრებების დროს სხეულის ტემპერატურის (სიცხის) მართვაში დაეხმაროს.

#როგორ მუშაობს ახალი ტექნოლოგია

CryoTherm Palm ტრადიციული აღდგენის მოწყობილობებისგან განსხვავდება. როგორც Athletech News წერს, ის შექმნილია არა მხოლოდ ვარჯიშის შემდგომი აღდგენისთვის, არამედ უშუალოდ ვარჯიშის პროცესში — მისვლებს (სეტებს) შორის, ტაიმაუტების, წყლის შესვენებებისა თუ ტაიმებს შორის — აქტიურად გამოსაყენებლად.

მოწყობილობა ორივე ხელისგულისთვის იყენებს ორმხრივ გამაგრილებელ ზედაპირებს და Therabody-ს დაპატენტებულ Cryothermal ტექნოლოგიას, რომელიც ყინულის, წყლის ან დამატებითი მოსამზადებელი პროცედურების გარეშე ინარჩუნებს კალიბრებულ ტემპერატურას. მოწყობილობა სამ ცივ რეჟიმს გვთავაზობს: 8°C, 12°C და 16°C. ამასთან ერთად, შეუძლია უზრუნველყოს ლოკალიზებული ცივი, სითბური და კონტრასტული თერაპია.

#სამეცნიერო კვლევები ეფექტიანობის დასადასტურებლად

Therabody-ს განცხადებით, CryoTherm Palm ხელისგულის გასაგრილებელი ერთადერთი მოწყობილობაა, რომელმაც ბაზარზე გამოსვლამდე ორ კონტროლირებად კვლევაში გაიარა ვალიდაცია. პირველი კვლევა სამხრეთ კალიფორნიის უნივერსიტეტში (USC) I დივიზიონის სპორტსმენებთან ჩატარდა, მეორე კი, ფლორიდის უნივერსიტეტთან თანამშრომლობით — IMG აკადემიაში ელიტურ ფეხბურთელებთან.

USC-ის კვლევამ, რომელშიც 21 კოლეჯის სპორტსმენი მონაწილეობდა (ისინი თავს ზემოთ ჭიმს — Overhead press-ს ასრულებდნენ ოთხ მისვლაში, 1-გამეორებიანი მაქსიმუმის [1RM] 85%-ზე), შთამბეჭდავი შედეგები აჩვენა. კვლევის მიხედვით, სპორტსმენებმა 28%-ით მეტი სამუშაო მოცულობა შეასრულეს, ბოლო მისვლაში კი 58%-ით მეტი გამეორება დააფიქსირეს. ამასთან, საკონტროლო ჯგუფთან შედარებით, მათი მოჭიდების ძალა აღდგენის შემდეგ 7%-ით გაიზარდა.

არანაკლებ შთამბეჭდავი იყო IMG აკადემიის კვლევის შედეგებიც, რომელშიც 17-დან 19 წლამდე ასაკის 22 ელიტური ფეხბურთელი მონაწილეობდა. CryoTherm Palm-ის გამოყენებით სპორტსმენებმა 60%-ით მეტი სიგრილე იგრძნეს, მაქსიმალური სპრინტის სიჩქარე 2.45%-ით გაზარდეს და განმეორებითი, მაქსიმალური ინტენსივობის ძალისხმევისას სპრინტის სიჩქარის შენარჩუნების მაჩვენებელი 4.7%-ით გაიუმჯობესეს.

#გამოყენება ელიტურ სპორტში

ტექნოლოგია უკვე დაიტესტა რეალურ პირობებშიც. როგორც Athletech News იუწყება, CryoTherm Palm ინგლისის ეროვნულმა საფეხბურთო ნაკრებმა საწვრთნელ ბანაკებში, მსოფლიო ჩემპიონატის წინა შეხვედრების დროს და აღდგენის პროტოკოლებში გამოიყენა. ამ მოწყობილობის გამოსვლა განსაკუთრებით აქტუალურია ჩრდილოეთ ამერიკაში დაგეგმილი ზაფხულის მსოფლიო ჩემპიონატის ფონზე, სადაც მაღალი ტემპერატურა მნიშვნელოვან გამოწვევას წარმოადგენს.

„CryoTherm Palm ამ მისიას უშუალოდ სავარჯიშო სესიის განმავლობაში აგრძელებს — იგი სპორტსმენებს ეხმარება, გადაავადონ დაღლილობის დადგომა, შეინარჩუნონ ინტენსივობა და მაქსიმალური სარგებელი მიიღონ ყოველი ძალისხმევისგან,“ — აცხადებს Therabody-ს მთავარი სამეცნიერო ოფიცერი, ტიმ რობერტსი.

#რას ნიშნავს ეს ქართველი სპორტსმენებისთვის

ქართველი სპორტსმენებისთვის, რომლებიც ზაფხულის ცხელ თვეებში ვარჯიშობენ, ეს ტექნოლოგია შესაძლოა შედეგების გასაუმჯობესებელ სასარგებლო ინოვაციად იქცეს. მოწყობილობა განსაკუთრებით მნიშვნელოვანი შეიძლება იყოს ძალისმიერი და კარდიოვარჯიშებისთვის, სადაც სხეულის ტემპერატურის მართვა პირდაპირ კავშირშია ვარჯიშის ინტენსივობასა და გამძლეობასთან.

CryoTherm Palm ასახავს აღდგენის ტექნოლოგიების ბაზარზე არსებულ ფართო ტენდენციას, სადაც ბრენდები სცდებიან სარელაქსაციო (სამასაჟე) თოფებისა და კომპრესიული ჩექმების ფარგლებს და ძილის, სითბოს, ჰიდრატაციისა და რეალურ დროში ფიზიკური მონაცემების (პერფორმანსის) მხარდაჭერის მიმართულებებს ითვისებენ.

მოწყობილობა ამჟამად აშშ-ში 399.99 დოლარად არის ხელმისაწვდომი, ევროპაში, დიდ ბრიტანეთში, ავსტრალიასა და კანადაში კი გაყიდვაში შემოდგომიდან გამოვა.