ბოჭკოვანი დანამატი ამცირებს მუხლის ართრიტის ტკივილს და აძლიერებს კუნთებს

მუხლის ოსტეოართრიტი მთელ მსოფლიოში ასობით მილიონ ადამიანს აწუხებს და ქრონიკული ტკივილისა და შეზღუდული მობილურობის ერთ-ერთ მთავარ მიზეზს წარმოადგენს (განსაკუთრებით ხანდაზმულ ასაკში). ახალი კლინიკური კვლევა ამ პრობლემის მოგვარების პოტენციურად მარტივსა და ხელმისაწვდომ გზას გვთავაზობს.

#ბოჭკოვანი დანამატი ტკივილის წინააღმდეგ

როგორც ScienceDaily წერს, ნოტინგემის უნივერსიტეტის მკვლევრებმა INSPIRE-ის კლინიკური ცდა ჩაატარეს, რომელშიც მუხლის ოსტეოართრიტის მქონე 117-მა მოზრდილმა ადამიანმა მიიღო მონაწილეობა. კვლევაში იყენებდნენ ინულინს — ბუნებრივ ბოჭკოვან დანამატს, რომელიც ბუნებრივად გვხვდება ვარდკაჭკაჭას (ციკორიის) ფესვში, მიწავაშლასა (იერუსალიმის არტიშოკი) და სხვა ბოსტნეულში.

ექსპერიმენტი ექვსი კვირა გრძელდებოდა და მონაწილეები ოთხ ჯგუფად დაიყვნენ: ნაწილი მხოლოდ ინულინს იღებდა, ნაწილი მხოლოდ ციფრულ ფიზიოთერაპიულ პროგრამას მიჰყვებოდა, მესამე ჯგუფი ორივეს აერთიანებდა, დანარჩენები კი პლაცებოს იღებდნენ.

#გამოკვეთილი შედეგები

კვლევის მთავარი ავტორი, დოქტორი აფროდიტე კოურაკი აღნიშნავს, რომ ინულინმა და ფიზიოთერაპიამ მუხლის ტკივილი ცალ-ცალკე შეამცირა. თუმცა, დამატებითი სარგებელი მხოლოდ ბოჭკოვანი დანამატის ჯგუფში გამოვლინდა: გაუმჯობესდა ხელის მოჭიდების ძალა და შემცირდა ტკივილის მიმართ მგრძნობელობა.

განსაკუთრებით მნიშვნელოვანია ის, რომ ინულინის ჯგუფში კვლევის მიტოვების მაჩვენებელი მხოლოდ 3.6% იყო, მაშინ როცა ფიზიოთერაპიის ჯგუფში ამ მაჩვენებელმა 21%-ს მიაღწია. ეს იმაზე მიუთითებს, რომ ბევრი პაციენტისთვის ყოველდღიურ რუტინაში დანამატის ჩართვა ბევრად უფრო მარტივია, ვიდრე სავარჯიშო პროგრამის მუდმივი შესრულება.

#ნაწლავ-კუნთ-ტკივილის ღერძი

მკვლევრები მიიჩნევენ, რომ პრებიოტიკული ბოჭკოვანი დანამატი ნაწლავის მიკრობიომზე — მილიარდობით ბაქტერიაზე ახდენს გავლენას, რომელიც საჭმლის მომნელებელ სისტემაში ბინადრობს და ორგანიზმის ჯანმრთელობის მრავალ ასპექტზე, მათ შორის, ტკივილის აღქმაზე მოქმედებს.

როდესაც სასარგებლო ბაქტერიები ინულინს მოიხმარენ, ისინი მოკლეჯაჭვიან ცხიმოვან მჟავებს წარმოქმნიან. მათ შორისაა ბუტირატი — ნაერთი, რომელიც მთელ ორგანიზმში ანთებასა და ტკივილის ბიოლოგიურ მექანიზმებზე ახდენს გავლენას.

კვლევაში ინულინის მიმღებ მონაწილეებს გაეზარდათ როგორც ბუტირატის, ისე გლუკაგონის მსგავსი პეპტიდ-1-ის (GLP-1) — ტკივილის რეგულაციასა და კუნთების ჯანმრთელობასთან დაკავშირებული ნაწლავის ჰორმონის დონე. GLP-1-ის გაზრდილი დონე ასევე უკეთეს ხელის მოჭიდების ძალასთან კორელირებდა, რაც ნაწლავის ჯანმრთელობასა და კუნთების ფუნქციას შორის შესაძლო კავშირზე მიუთითებს.

#ალტერნატივა ტრადიციულ მიდგომებს

კვლევის უფროსი ავტორი, პროფესორი ანა ვალდესი აღნიშნავს: „კავშირი, რომელიც GLP-1-სა და ხელის მოჭიდების ძალას შორის დავაფიქსირეთ, განსაკუთრებით საინტერესოა და უფრო ფართო ნაწლავ-კუნთ-ტკივილის ღერძზე მიუთითებს, რაც შემდგომ გამოკვლევას საჭიროებს.“

მუხლის ოსტეოართრიტის მკურნალობა, როგორც წესი, ტკივილგამაყუჩებელ მედიკამენტებს (რომლებსაც შესაძლოა გვერდითი ეფექტები ჰქონდეს) ან ისეთ სავარჯიშო პროგრამებს მოიცავს, რომელთა გრძელვადიანად შესრულება ზოგიერთი პაციენტისთვის რთულია. ბოჭკოვანი დანამატი შესაძლოა არსებული მკურნალობის მეთოდების უსაფრთხო, მარტივად ასატან და ეფექტურ ალტერნატივად ან დამატებად იქცეს.

როგორც დოქტორი კოურაკი აღნიშნავს: „ჩვენმა აღმოჩენებმა აჩვენა, რომ პრებიოტიკული დანამატით ნაწლავის ჯანმრთელობაზე ზრუნვა უსაფრთხო, მარტივად ასატანი და ეფექტური გზაა მუხლის ოსტეოართრიტით დაავადებულ ადამიანებში ტკივილის შესამცირებლად.“

კვლევის შედეგები მიუთითებს, რომ მარტივ დიეტურ ცვლილებას — საუზმესა თუ იოგურტში ბოჭკოვანი დანამატის დამატებას — ტკივილის მნიშვნელოვნად შემცირება და ფიზიკური ფუნქციის გაუმჯობესება შეუძლია. საზოგადოებრივი ჯანდაცვის თვალსაზრისით ეს მიდგომა განსაკუთრებით პერსპექტიულია, რადგან ადამიანებს მისი ყოველდღიურ ცხოვრებაში მარტივად ჩართვა შეუძლიათ.