Gold's Gym-მა დანიშნა ბრედ რეინოლდსი ერთადერთ აღმასრულებელ დირექტორად და აცხადებს მასშტაბურ გაფართოებას

ფიტნესინდუსტრიის ერთ-ერთი ყველაზე ცნობილი ბრენდი, Gold's Gym, მმართველობით სტრუქტურასა და განვითარების სტრატეგიაში მნიშვნელოვან ცვლილებებს აცხადებს. როგორც Athletech News წერს, კომპანია უარს ამბობს ცხრა თვის განმავლობაში არსებულ თანადირექტორების მოდელზე და ერთადერთ აღმასრულებელ დირექტორად ბრედ რეინოლდსს ნიშნავს.

#ხელმძღვანელობის რესტრუქტურიზაცია

დენი უეგონერი, რომელიც Gold's Gym-თან 26 წელზე მეტია თანამშრომლობს და ბოლო პერიოდში რეინოლდსთან ერთად თანადირექტორის პოსტს იკავებდა, ახლა ოპერაციების მთავარი დირექტორის როლს გადაიბარებს. ის ძირითადად ახალი სავარჯიშო დარბაზების განვითარებასა და მათ ყოველდღიურ ოპერაციებზე იქნება ფოკუსირებული.

რეინოლდსი, რომელიც Gold's Gym-ს გასული წლის სექტემბერში შემოუერთდა, აცხადებს, რომ ბრენდი აგრესიულ გაფართოებას გეგმავს. მისი ინფორმაციით, მიმდინარე წელს 20-დან 25-მდე ახალი დარბაზის გახსნაა მოსალოდნელი, როგორც ადგილობრივ (აშშ), ისე საერთაშორისო ბაზარზე.

#ფრანშიზის ოპერაციების ტრანსფორმაცია

კომპანიის ოფიციალური განცხადების თანახმად, რეინოლდსის ხელმძღვანელობით, Gold's Gym-ის ფრანშიზის ქსელი და მომსახურება ფუნდამენტურ ტრანსფორმაციას განიცდის. ეს ცვლილება მას შემდეგ დაანონსდა, რაც გასულ შემოდგომაზე, ხელმისაწვდომი ფასებით ცნობილმა ოპერატორმა, EoS Fitness-მა სამხრეთ კალიფორნიაში Gold's Gym-ის 23 ლოკაცია შეიძინა.

სხვა ფიტნესოპერატორების მსგავსად, პანდემიით გამოწვეული ფინანსური კრიზისის გამო, 2020 წელს Gold's Gym-ს გაკოტრების პროცედურის დაწყება მოუხდა. იმავე წელს კომპანიამ დაახლოებით 30 კორპორაციული დარბაზი დახურა. მოგვიანებით, RSG Group-მა, რომელიც ფლობს ისეთ ბრენდებს, როგორიცაა McFit, John Reed და Heimat, Gold's Gym 100 მილიონ დოლარად შეიძინა.

#დღეს და მომავალში

როგორც Athletech News აღნიშნავს, Gold's Gym-ს ამჟამად მსოფლიოში დაახლოებით 550 დარბაზი აქვს, საიდანაც 180 აშშ-ში მდებარეობს. რეინოლდსი ბრენდის უნიკალურობას უსვამს ხაზს: "ჩემი აზრით, Gold's Gym მულტილოკაციურ ფიტნესში ყველაზე საკულტო სახელი და ბრენდია".

#თანამედროვე სერვისები და გაფართოების გეგმები

რემოდელირების ძალისხმევა Gold's Gym-ის ძველი დიდების დაბრუნების სტრატეგიის მნიშვნელოვანი ნაწილი იქნება. ახლად გახსნილი დარბაზები, მათ შორის ფლაგმანური ობიექტი ოსტინში, ტრადიციულ ძალისმიერ აღჭურვილობასთან ერთად, მომხმარებელს სთავაზობს ჰიდრომასაჟს (HydroMassage), საუნებსა და CryoLounge აღდგენით ზონებს.

კომპანიამ ასევე გახსნა ჩრდილოეთ ამერიკის პირველი Hyrox Performance Center-ი ლითლ ელმში (ტეხასი), რაც ფუნქციური ფიტნესის მზარდ ტენდენციას პასუხობს. წლის ბოლოსთვის Gold's Gym დალასის რაიონში ახალი ფლაგმანური დარბაზის გახსნას გეგმავს, რომელიც უახლესი აღჭურვილობისა და მომხმარებელთა გამოცდილების მთავარი სატესტო ბაზა იქნება.

"Gold's Gym ყოველთვის ეფუძნებოდა რწმენას, რომ სერიოზული შედეგები ყველასთვის ხელმისაწვდომია," — აცხადებს რეინოლდსი. "ამ ბრენდმა ფიტნესის ისტორიაში თავისი ადგილი უკვე დაიმსახურა. ახლა ჩვენი მიზანია, მომავლის წარმატებაც დავიმსახუროთ. ჩვენ შევქმნით საუკეთესო ფრანშიზულ ორგანიზაციას, ავიყვანთ მომხმარებელთა გამოცდილებას ახალ დონეზე და Gold's Gym-ს ვაქცევთ სტანდარტად, რომელსაც ფიტნესინდუსტრიის ყველა სხვა ბრენდი შეედრება".